Sindikata e Punonjësve të Postë-Telekomit Shqiptar (SPPTSH), duke vërejtur përhapjen e shpejtë të virusit COVID-19 në Shqipëri kërkon një reagim urgjent për të mbrojtur shëndetin në punë, vendet e punës dhe stimuluar ekonominë. Ne vlerësojmë punën e Qeverisë për luftën që po zhvillon per te ndaluar përhapjen e virusit dhe mbështjen financiare te akorduar per punen e palodhur te stafit mjekesor per te perballuar kete emergjencë kombëtare. Gjithsesi duke qenë se situata e karantines pritet te zgjasë, është e qartë që të mbrosh tërë shoqërinë do të thotë të mbrosh njerëzit në punë. Qeveria, punëdhënësit dhe sindikatat duhet të veprojnë për të mbrojtur punonjësit dhe për të trajtuar transmetimin e virusit në vendet e punës.
Punonjësit e Telekomunikacionit, Postave, Qendrave te Thirrjeve (Call Center) dhe të gjithë punonjësit në të gjithë sektorët e shërbimeve, shumë prej të cilëve janë në kontakt me shumë njerëz në punën e tyre të përditshme, tani e gjejnë veten në pararojë të përpjekjeve të shoqërisë për të frenuar përhapjen e pandemisë Covid-19. Punonjësit e këtyre shërbimeve mund të kenë nevojë për vet karantinim në vazhdim, prandaj politikë-bërësit duhet të garantojnë pagën e të “sëmurëve” për këtë periudhë karantinimi në mënyrë që ata të mbrojnë veten dhe të gjithë ne.
Fondi Monetar Ndërkombëtar (FMN) ka paralajmëruar se COVID-19 mund të shkaktojë një recesion ekonomik të ngjashëm me atë te vitit 2008. Ndërsa ndikimi i virusit përhapet më tej, dialogu ndërmjet sindikatave, punëdhënësve dhe qeverisë është me rëndësi jetike në mbrojtjen e shëndetit të punonjësve dhe të drejtat e tyre në punë. Nevoja që qeveria të veprojë së bashku me këta aktorë për të ngritur ekonominë dhe për t’i mbajtur njerëzit në punë është e qartë. Prandaj Sindikata e Punonjësve të Postë-Telekomit Shqiptar për të gjithë punonjësit e këtij sektori i bën thirrje:
- Qeverisë:
- Të hartojë dispozita të posaçme për tu zbatuar nga punëdhënësit për të zgjatur menjëherë të drejtat e pushimit të paguar për punonjësit në rast të prekjes nga virusi ose karantinimit të detyruar.
- Të zgjerojë mbrojtjen sociale për të gjithë punonjësit, pavarësisht nga statusi i tyre i punës (me kohë të plotë ose të pjesshme);
- Në mbështetje te Nenit 48 Kodi i Punës pika 2 “ Mjedisi i Punës” , ku Këshilli i Ministrave përcakton masat që duhet të ndërmarrë punëdhënësi, kërkojmë hartimin e masave mbrojtëse më specifike për punëdhënësit për të mbrojtur punonjësit.
- Të vendos paketa stimuluese me shpenzimet shtetërore që synojnë të mbajnë punën dhe ekonominë, duke mbrojtur pagat, mirëqenien e punëtorëve dhe të bizneseve që do të preken nga mungesa e fuqisë punëtore.
- Të bashkëpunojë me punëdhënësit dhe sindikatat për të hartuar lehtësime fiskale në mënyrë që punëdhënësit t’i përgjigjen kërcënimeve të paraqitura nga COVID-19 dhe të sigurojnë që punëtorët e tyre janë të mbrojtur dhe nuk përbëjnë rrezik për shoqërinë.
- Punëdhënësve:
- Punëdhënësit e ketij sektori duhet të sigurojnë që punëtorëve t’u jepen mjetet e nevojshme cdo ditë që paraqiten në punë (dorezat,maskat,disinfektantët etj) për të garantuar sigurinë e tyre dhe atë të publikut të gjerë.
- Të garantojë sigurinë e gjithë punonjësve duke disinfektuar ambientet e punës, ajrosur, respektuar distancën në vendin e punës, krijuar kushte për higjenën personale dhe t’u sigurojnë atyre informacionin për sa i përket pajisjeve që përdorin;
- Trajnimi i punonjësve në lidhje me masat që duhet të marrin për Covid 19, që të kuptojnë rreziqet me të cilat përballen dhe besimin në pajisjet e tyre.
- Të promovojnë punën nga shtëpia (online) sa më shumë të jetë e mundur.
- Punonjësit me risk të lartë ose me sëmundje kronike të kenë orare të reduktuara ose mundësisht të punojnë nga shtëpia.
- Të hartohen masa që në pikat e shërbimit për publikun të evitohet kontakti dhe grumbullimi i njërëzve.
- Të mbulohen me pagë të plotë punonjësit që mund te preken nga Covid 19 ose duhet të karantinohen.
- Të mundesohet që një nga prindërit me fëmijë të vogël të qëndrojë në shtëpi gjatë periudhës kur shkollat do të jenë të mbyllura.
- Privatësia dhe informacioni personal i punonjësve duhet të mbrohen pasi ato i nënshtrohen ekzaminimeve mjekësore nga COVID-19.
- Të bashkëpunojnë me sindikatat dhe përfaqësuesit e punonjësve për të identifikuar kërcënimet ndaj shëndetit, të drejtave dhe mirëqenies së punonjësve.
Mos harroni që punonjësit e sektorit tonë janë në vijën e parë të ndikimeve ekonomike, sociale dhe shëndetësore të COVID-19. Marrëveshjet kolektive sigurojnë kontekstin gjithëpërfshirës dhe të adaptueshëm për marrjen e këtyre vendimeve të përbashkëta. Mos respektimi i tyre mund të rrisë përhapjen e virusit! Të gjithë sëbashku do ta kalojmë ketë situatë!
SINDIKATA E PUNONJESVE TE POST-TELEKOMIT SHQIPTAR
